ശുചീകരണ തൊഴിലാളികളെ ആദരിച്ച് ജെസിഐ കണ്ണൂർ എലഗൻസ്

ജെസിഐ വാരാഘോഷത്തിന്റെ ഗ്രാൻഡ് ഫിനാലെയിൽ 50 ഓളം ശുചീകരണ തൊഴിലാളികൾക്ക് ആദരം

കണ്ണൂർ: ജെസിഐ വാരാഘോഷത്തിന്റെ ഗ്രാൻഡ് ഫിനാലെയുടെ ഭാഗമായി ജെസിഐ കണ്ണൂർ എലഗൻസ് ജില്ലാ ആശുപത്രിയിലെ ശുചീകരണ തൊഴിലാളികളെ ആദരിച്ചു. ആശുപത്രിയിലെ 50 ഓളം വരുന്ന ശുചീകരണ തൊഴിലാളികളെയാണ് ‘സല്യൂട്ട് ദ സൈലന്റ് സ്റ്റാർ’ എന്ന പരിപാടിയിലൂടെ ആദരിച്ചത്.

ജെസിഐ വാരാഘോഷത്തിന്റെ ഏഴാം ദിനത്തിൽ ജില്ലാ ആശുപത്രിയിൽ നടന്ന പരിപാടി, സമൂഹത്തിന്റെ ആരോഗ്യസംരക്ഷണത്തിൽ നിശ്ശബ്ദമായി പ്രവർത്തിക്കുന്ന ശുചീകരണ തൊഴിലാളികളുടെ സേവനങ്ങൾക്ക് ആദരം അർപ്പിക്കുന്നതായിരുന്നു.

ജെസിഐ കണ്ണൂർ എലഗൻസ് പ്രസിഡന്റ് ജെഎഫ്എം ശ്രീഹരി എ.കെ. അധ്യക്ഷത വഹിച്ച ചടങ്ങിൽ മുൻ മേഖലാ പ്രസിഡന്റ് ജെസിഐ സെനറ്റർ ജെസിൽ ജയൻ മുഖ്യാതിഥിയായി. ജില്ലാ ആശുപത്രി സൂപ്രണ്ട് ശ്രീ. ഗ്രിഫിൻ വിശിഷ്ടാതിഥിയായി.

ജെസിഐ വീക്ക് ഡയറക്ടർ ജെസി ധനേഷ് തുടങ്ങിയവർ സംസാരിച്ചു. സമൂഹത്തിന്റെ ആരോഗ്യവും ശുചിത്വവും ഉറപ്പാക്കുന്നതിൽ നിർണായക പങ്കുവഹിക്കുന്ന ശുചീകരണ തൊഴിലാളികളുടെ സേവനങ്ങളെ ചടങ്ങിൽ പ്രത്യേകം അനുസ്മരിച്ചു.

ജെസിഐ ഇന്ത്യയുടെ 77-ാം വാർഷികത്തോടനുബന്ധിച്ച് സംഘടിപ്പിച്ച ജെസിഐ വീക്ക് 2026-ന്റെ ഭാഗമായാണ് പരിപാടി നടന്നത്. ‘77 Years of Legacy, 7 Days of Impact’ എന്ന സന്ദേശവുമായി സംഘടിപ്പിച്ച വാരാഘോഷത്തിന്റെ ഗ്രാൻഡ് ഫിനാലെയിൽ ശുചീകരണ തൊഴിലാളികളെ ആദരിച്ചത് ശ്രദ്ധേയമായി.